Saturday, April 7, 2012

အာရုဏ်ဦးရဲ့ အရသာ

အာရုဏ်ဦး၏ အရသာသည် ဘာနှင့်မျှမတူ။ တမူ ထူးခြား သော အရသာ ရှိလှသည်။ အထူးသဖြင့် ပင်လယ်ပြင် တွင် ခရီးလွင့်မြောရင်း နံနက်လင်း အာရုဏ် ကို မျှော်လင့်နေသူများ အတွက် ပို၍ အဓိပ္ပါယ်ရှိသည်ဟု ဆိုကြသည်။ ခရစ်တော်ဘုရား၏ ရှင်ပြန်ထမြောက်ရာနေ့ သိုိ့ ချည်းကပ်လာလေတိုင်း၊ အာရုဏ်ဦး၏ ထူးခြားသော အရသာကို တမြေ့မြေ့ ခံစားရင်း ကြည်နူး နေမိသည်။ ပစ္စိဖိတ်သမုဒ္ဒရာပြင်ကျယ်ကြီးသည် ခါတိုင်း နဲ့မတူ တမူထူး၍ လှပနေ သည်။ ယခင်က လှိုင်းလုံးကြီးတွေ တလိမ့်လိမ့် လှုပ်ရှားနေသော ရေပြင်ကျယ်ကြီးသည် ကြည်လင်၍ ငြိမ်သက် လျှက် ရှိသည်။ အာရုဏ်ဦး၏ ရှေ့ပြေး ရောင်ခြည်နုတို့သည် ကောင်းကင်ပြင်ကို ပို၍ လှပ နေစေပါသည်။ မှန်သားပြင်လို ကြည်လင်နေသော ရေပြင်ပေါ်သို့ ထိုအလှများ ထင်ဟပ် လိုက်သော အခါတွင်မူကား ခိုင်းနိုင်း ဖွယ်ရာ မရှိလောက်အောင် တင့်တယ်လှသော အာရုဏ် ဦး၏ အလှကို ကြည်နူးခြင်း များစွာ ခံစားရမိသည်။ ဘုရားရှင်၏ ဖန်ဆင်းမူရာ လက်ရာများကို ကျေးဇူးတင်ရင်း ကျေးဇူးတော်ကို အားရပါးရ ချီးမွမ်းလိုက်ပါသည်။


“ဟော ဆရာလာပြီ၊ ဆရာလာပြီ” GoldenGateParkပန်းဥယျာဉ်ထဲ ချိုးဝင် လိုက်သည်နှင့် ကြိုရောက်နှင့်နေကြသော အသင်းတော်မှ မိတ်ဆွေ များက ဝမ်းပန်းတသာ ကြိုဆို နေကြ ပါသည်။ ဝေသီမြင့်မားသော သစ်ပင် များတို့၏ အလယ်မှာ မြကတ္တီပါကော်ဇော ခင်းထားသလို စိမ်းစိုသာယာ လှသော မြက် ခင်းပြင်ကျယ်၌ အသင်းသူ အသင်းသားများ တဖွဲဖွဲ စုရုံး လာနေကြသည်။


ကလေးသူငယ်တချို့လဲ ပျော်ရွှင်စွာ ပြေးလွှားဆော့ကစား နေကြသည်။ “ဆရာ ကျွန်မတို့က ဟိုအဖွဲ့ကို ကျွန်မတို့အသင်းတော်က ထင်လို့ သွားရောပြီး သီချင်း လိုက်ဆိုနေတာ ဆိုရင်းနဲ့ ကိုယ့်အဖွဲ့ မဟုတ်မှန်းသိလို့ အသာလေး ပြန်လှဲ့လာခဲ့တာ။” ဝေလီဝေလင်းအချိန်မို့ တချို့တွေ စောစောရောက်၍ အဖွဲ့မှားကြောင်းပြောပြီး ပွဲကျနေ ကြသည်။ဆန်ဖရန်စစ္စကို မြန်မာနှစ်ခြင်း အသင်းတော်၏ နှစ်စဉ် ကျင်းပ လျက်ရှိသော “အီစတာ အာရုဏ်ဦး ဝတ်ပြုခြင်း အစီအစဉ်”သည် အလွန်ပင် နှစ်ခြိုက်ဘွယ်ရာ အစဉ်အလာလေးတခု ဖြစ်လာခဲ့သည်။ လွန်ခဲ့တဲ့အချိန်က လူဆယ်ယောက်ခန့်နဲ့ အစပြုခဲ့သော်လည်း ယခု အခါ နှစ်စဉ်လူတရာကျော် ပါဝင်လာ ကြပြီဖြစ်သည်။ အာရုဏ်ဦး၏ အရသာ၊ ရှင်ပြန် ထမြောက်ခြင်း၏ အနှစ်သာရကို စစ်မှန်စွာ ခံစားလာကြသော အခါ၊ မည်မျှပင် အေးချမ်း လင့်ကစား၊ အရောက် ကြိုးစား၍ လာကြသည်။ မည်မျှပင် ဝေးလင့်ကစား အချိန်မှီ စုရုံး လာကြသည်။
သက်ကြွယ်မိခင်များတို့သည် နွေးထွေးသော သားမွှေး အနွေးထည်ရှည်များ၊ မွေးပွ ခေါင်းစွပ်များ၊ လက်အိပ် များနှင့် နွေးနွေးထွေးထွေး မြင်ရသောအခါ ခရစ်တော် ရှင်ပြန် ထမြောက်ရာ နံနက် စောစောအချိန်၌ သခင် ဘုရား၏ သင်္ချိုင်းတော်ကို သွားခဲ့ကြသော သခင်ဘုရားကို အလွန်ချစ်ကြသည့် ယုံကြည်ခြင်း ကြီးမားသော အမျိုး သမီးများတို့ကို ပြေး၍ သတိရမိသည်။ ထိုအချိန်က သူတို့သည် ကြောက်ရွံ့ခြင်းနှင့် သွားခဲ့ကြသော်လည်း သခင်ဘုရား ရှင်ပြန်ထမြောက် တော်မူခဲ့သောကြောင့် ဝမ်းမြောက်ခြင်းနှင့် ပြန်သွားခဲ့ကြရသည်။သူတို့သည်ငိုကြွေးခြင်းနှင့်သွားခဲ့ကြသော်လည်း၊ရယ်မောခြင်းနှင့် ပြန်ခဲ့ကြရသည်။ သူတို့သည် မျှော်လင့် ခြင်း မဲ့စွာနှင့် သွားခဲ့ကြသော်လည်း၊ အသက်ရှင်သော သတင်းကောင်း မျှော်လင့်ခြင်းနှင့် ခွန်အားသစ်များ ရရှိပြီး ပြန်ခဲ့ကြရသည်။ ခရစ်တော်ဘုရား ရှင်ပြန်ထမြောက်တော်မူခြင်း ကြောင့် သူတို့အတွက် အရာရာသည် အသစ်တဖန် ပြောင်းလဲသွားလေပြီ ဖြစ်သည်။ ထိုနေ့က အာရုဏ်ဦးသည် သူတို့အတွက်သာမက၊ လူသားတရပ်လုံးအတွက် အလှပဆုံး၊ အသာယာဆုံး နှင့် အနှစ်သာရအရှိဆုံး ဖြစ်ခဲ့သည်။

“ဟေး ပန်းဥယျာဉ်မှာ ပန်းမခူးရလို့ ဆိုင်းဘုတ်ရေးထားတယ်နော် သတိထားကြ”အာရုဏ်ဦးနှင့်အပြိုင် အီစတာ အမှီ ဖူးပွင့်ဝေဆာနေကြသော ချယ်ရီပင်အောက်မှာ အသင်း တော်၏ လှပျိုလေးများ ဓါတ်ပုံရိုက်ကြ၊ ဗွီဒီယိုရိုက် ကြနှင့် မမောနိုင်မပန်းနိုင် မြူးကြွ နေကြသည်။ ဓါတ်ပုံဆရာနှင့်၊ ဗွီဒီယိုဆရာခမျာ ခြေခလုပ်တိုက်လောက်အောင် အလုပ်များ နေရသည်။ အသက်တာ၏ အာရုဏ်ဦးနှင့် တူသည့် ပျိုရွယ်သူ၊ လူငယ် မောင်မယ်များ အတွက်လည်း အထူးပင် အဓိပ္ပါယ်ရှိလှသော အာရုဏ်ဦးပင် ဖြစ်ပါသည်။

အာရုဏ်ဦး ဝတ်ပြု ကိုးကွယ်ခြင်းသည် အလွန်တရာမှ အေးချမ်း ကြည်နူးဘွယ် ကောင်းလှပါသည်။ ဘုရားရှင် ဖန်ဆင်းတော်မူသောသဘာဝ လောက၏အလယ်မှာ၊ရှင်ပြန်ထမြောက်တော်မူသောဘုရားရှင်၏သားတော် ယေရှု့ကို ဗဟိုပြုပြီး၊ ဓမ္မသီချင်းများ သီဆိုခြင်း၊ သမ္မာကျမ်းစာ ဖတ်ခြင်း၊ ဆုတောင်းခြင်း၊ သက်သေခံ ဝေမျှခြင်းများ တို့သည် တမူထူး၍ ခွန်အား ယူဘွယ်ရာ ဖြစ်ရပါသည်။ ဝမ်းမြောက်၍ ပြုံးရွှင်သော အပြုံးများတို့သည် မေ့ပျောက် ၍ မရနိုင်အောင် စွဲထင် ကျန်ခဲ့ကြပြီ ဖြစ်သည်။“ကဲကဲ-ဘုရားရှိခိုးပြီးပြီ-ဗိုက်ဖြည့်ရအောင် ဒီဘက်ကို လာကြ- လာကြ” စားသောက်ရေး တာဝန်ခံမှ ဆော်ဩလိုက်သော အသံလာရာဘက်သို့ ကြည့်လိုက်သောအခါ အငွေ့ တထောင်းထောင်းနှင့် ကြိုဆိုနေသော အစားအသောက်များ အိုးကြီး အိုးငယ် အသွယ်သွယ် တန်းစီနေသည်ကို စားချင်စဖွယ် တွေ့ရသည်။ မြန်မာပြည်ကို သတိရစေသည့် ကောက်ညှင်းပေါင်း၊ ငချိပ်ပေါင်း၊ ပဲပြုတ်ပူပူလေး၊ ငါးခြောက်ကြော်၊ ဗလခြောင်ကြော်၊ ဆီထမင်း၊ အသားကြော်၊ လဘက်ရည်၊ ကော်ဖီများအပြင် အမေရိကန် နံနက်စာ မုန့်မျိုးစုံ၊ စုံလွန်း လှပါသည်။ မိသားစုများမှ စေတနာအပြည့်နှင့် ပြင်ဆင်ချက်ပြုတ် ယူဆောင်လာ ကြသော အစဉ်အလာလေးသည်လည်း နှစ်စဉ် အာရုဏ်ဦးဝတ်ပြုခြင်း အစီအစဉ်အတွက် အားကောင်းသော ဆွဲဆောင်မှု့တခုပင် ဖြစ်ပါသည်။

“ဆရာ - ဆရာ ခုနက ပြောတဲ့၊ “လူ့ဘဝရဲ့အာရုဏ်ဦး” ဆိုတာကို သဘော ကျမိတယ်၊ နဲနဲလောက် ပိုရှင်းပြပါ လား ဆရာ”
“ဩ-အေးအေး-ရပါတယ်၊ စားရင်းသောက်ရင်း ပြောပြတာပေါ့”
အာရုဏ်ဦး၏ အနှစ်သာရကို ပိုမိုသိလို၍ မေးလာသောလူငယ်များအား၊ အသက်ရှင်တော် မူသော သခင်ယေရှု့ ကို နှလုံးသားမှာ ယုံကြည်လက်ခံလျှင်၊
*အမှောင်ကမ္ဘာထဲမှ လွတ်မြောက်၍ အလင်းတရားတည်းဟူသော အာရုဏ်ဦးသို့ ရောက်ခြင်း၊
*အပြစ်၏ ချည်နှောင်ခြင်းမှ လွတ်မြောက်၍ ကယ်တင်ခြင်း ဆုကျေးဇူးတည်းဟူသော အာရုဏ်ဦး ရရှိခြင်း၊
*မျှော်လင့်ခြင်း ကုန်ဆုံးသော ဘဝမှ ခွန်အားသစ် ပြည့်ဝသော အနာဂါတ်တည်းဟူသော အာရုဏ်ဦး ရရှိခြင်း၊
*ဆုံးရှုံးခြင်းတည်းဟူသော ညဥ့်နက်ထဲမှ အောင်မြင်ခြင်းတည်းဟူသော အာရုဏ်ဦး ရရှိခြင်း၊
*ငရဲ၌ ထာဝရ လောင်ကျွမ်းခံရမည့် အခြေအနေမှ ကောင်းကင်ချမ်းသာ တည်းဟူသော အာရုဏ်ဦး ရရှိခြင်း၊
စသည်တို့ကို ပြောပြလိုက်ရာ လူငယ်များက၊
“ကျေးဇူးတင်ပါတယ်ဆရာ ကျွန်တော်တို့အတွက် ဒီအာရုဏ်ဦး ဝတ်ပြုခြင်းမှာ ပါဝင်ရလို့ အများကြီးဘဲ ခွန်အားရပါတယ်၊ ခွန်အားသစ်နဲ့ဘဝကို ရင်ဆိုင်ရဲတဲ့ သတ္တိတွေလဲ အလိုလို ရှိလာပါတယ်။”
“အဲဒါ ဘာကြောင့်လဲ သိသလား”
“ဆရာ ပြောပြတဲ့-ခရစ်တော်ရှင် ပြန်ထမြောက်ခြင်းရဲ့ တန်ခိုးကြောင့် ဟုတ်တယ် မဟုတ်လား ဆရာ”
“အဲတာ သိပ်မှန်တာပေါ့- ခရစ်တော် ကိုယ်တိုင် ပြောခဲ့တယ်လေ၊ နားထောင်- ဆရာ ဖတ်ပြမယ်၊” (ယောဟန်၁၄း၁၉) “ငါသည် အသက်ရှင်သောကြောင့် သင်တို့သည်လည်း အသက်ရှင် ကြလိမ့်မည်။”တဲ့၊ ဘယ်လောက် ကောင်းသလဲ၊ တမန်တော် ရှင်ပေါလု ရေး ထားတာ ကြည့်အုံး၊ (၁ကော ၁၅း၅၇) “ငါတို့သခင် ယေရှုခရစ်အားဖြင့် ငါတို့အား အောင်ခြင်း အခွင့်ကို ပေးတော်မူသော ဘုရားသခင်၏ ကျေး ဇူးတော် သည် ကြီးလှစွတကား။”
လောက အာရုဏ်ဦးအလှကို နေ့စဉ် ခံစားရင်း ဘဝရဲ့ အာရုဏ်ဦးကို ရှင်ပြန် ထမြောက် တော်မူသော သခင် ယေရှုဘုရား ထံတော်မှ ခံစားရကြပါစေသော်။

မေတ္တာများစွာဖြင့်
ဆရာတော် ဦးလတ်ယေရှဲ (ဆန်ဖရန်စစ္စကို မြန်မာ နှစ်ခြင်းအသင်းတော်)

No comments: